青山依舊在，幾度夕陽紅。近日香港最熱門話題莫過於亞視玩完，呢間由麗的電視延續落來嘅老牌電視台，雖然幾經掙扎，最後仍然逃唔過衰亡嘅厄運，令人唏噓不已。
想當年，香港三間免費電視台鼎足而立，百花齊放，創作咗唔少優秀作品，被視為黃金歲月。可惜好景不常，佳視固然曇花一現，亞視亦即將消失，剩低無綫一台獨大，講起都幾可悲。其實又難怪嘅，香港市場有限，好多人才紛紛北上發展，加上整體經濟環境又唔係咁好，創意文化產業日漸萎縮，電視台嘅生存空間愈來愈窄，想企穩陣腳唔係咁容易嘅咋。
即係咁，大自然規律係適者生存，亞視經營不善，深陷財困，又遲遲搵唔到白武士打救，被淘汰一啲都唔出奇。問題係，免費電視市場本來已經缺乏競爭，日後豈不是更加單調？港府話就話以「一換一」方式，否決亞視續牌申請嘅同時，向電訊盈科旗下香港電視娛樂正式批出免費電視牌照，之不過咁，新免費電視台最快都要一年後至可以啟播，而且未必可以覆蓋全港，觀眾根本冇得選擇。
另一個問題係，亞視現有嘅頻譜點樣處理呢？港府係咁講嘅，會將當中嘅模擬頻譜暫時交予香港電台繼續廣播，而較珍貴嘅數碼頻道就會交由通訊局再行分配喎。嗱，唔好話功夫茶杞人憂天吖，港台接手亞視嘅模擬頻譜，就算技術上冇問題，器材及人手亦未必可以應付，到時得物無所用，盞嘥氣咋。仲有吖，如果港台乘機要求增撥資源，增加人手，港府又應唔應承呢？
係人都知，港台話就話屬於政府部門，由公帑供養，但就專門同政府唱反調，淪為反對派喉舌，如果再將頻譜交畀港台，隨時尾大不掉，弄巧反拙嘅咋。早前港台獅子開大口，要求撥款六十億元興建新廣播大樓，被質疑太過奢侈，後來係咁意削減至五十三億元，仍然被批評大花筒，未能獲得立法會通過。其實，港台管理混亂，多次爆出帳目不清、濫用公帑嘅醜聞，個底早就花晒，依家仲想花費巨資興建豪華總部，就算立法會肯開綠燈，民意都唔會支持喇。
所以話，將亞視嘅模擬頻譜交畀港台係咪適合，實在值得商榷，港府千祈唔好自己捉蟲吖。再講喇，港台究竟可以提供乜嘢節目，亦令人懷疑，如果播來播去都係嗰三幅被，等於浪費公帑及頻譜，不如慳番好過。計功夫茶話齋，將亞視嘅牌照及頻譜攞出來公開競投，仲實際得多喇！