政情：社區項目闖關急「成」咁
特首梁振英喺前年施政報告中，提出畀全港十八區各預留一億元去推展社區重點項目，但係十八區合共二十七個項目僅得葵青區「加強社區健康服務」呢個非工程項目經已推出，其他項目甚至連「立法會三關」嘅第一關民政事務委員會都未過，萬一年底區議會換屆後再起爭拗，呢個億元計劃分分鐘泡湯。聽聞民政事務局局長曾德成都唔敢再Hea，下周五一口氣將四區嘅五個項目提交上立法會，希望開快車趕工。
共27項目 至今僅1推出
社區重點項目要動工，首先要喺立法會過三關，即民政事務委員會、工務小組委員會同埋財務委員會。惟該計劃宣布咗兩年，總共二十七個項目，至今只有一個項目推出。面臨區議會即將換屆嘅壓力，曾德成掌管嘅民政事務局上個月開始發功，終於有多兩個項目獲工務小組開綠燈，另外有五個項目喺民政事務委員會獲得通過。
當局尋日再向立法會提交文件，就黃大仙區摩士公園嘅康樂設施改善工程、深水埗區嘅美孚鄰舍活動中心、荃灣區嘅重建西樓角花園項目，同埋沙田區嘅活化城門河河濱沙田市中心段項目及覆蓋沙田大圍明渠項目，尋求民政事務委員會嘅支持。之前當局都係將項目逐個提交立法會，但上個月起就一次過提交多個項目，明顯係為咗盡快趕上進度。
7項目明年首季始交立會
除咗急起直追，曾德成亦勤力咗，好似上個月民政事務委員會討論中西區、北區、離島合共五個項目，曾德成就親自出席會議，唔敢再懶懶閒。不過，重視歸重視，目前社區重點項目計劃進度仍然大滯後，其中有七個項目會喺今年第二季至第三季先至諮詢民政事務委員會，仲有另外七個項目更加要等到明年第一季先可以提上立法會。萬一有關項目遇上泛民拉布，都唔知何年何月先可以拍板動工，到時人工、材料樣樣都貴咗，一億元都唔知夠唔夠埋單？