中環出更：港科技遭爬頭 IT界促發力
政府成立創新及科技局（創科局）觸礁，令業界大失所望。日前政府就急急宣布改組後嘅創新及科技諮詢委員會成員名單，由原定做創科局局長嘅理工大學前副校長楊偉雄擔任主席，都算表達咗對科技嘅重視。但資訊科技業界就呼籲大家勿短視，支持成立一個高級別嘅科技專責部門。
香港資訊科技及通訊界日前舉行聯合春茗，業界精英群集。好耐唔見嘅資訊科技界前立法會議員譚偉豪及楊偉雄亦有出席，眾人一見到楊偉雄，都爭相上前同佢打招呼。
嘆想搵高官傾吓都難
香港資訊科技聯會會長邱達根（Duncan）講起創科局開局一波三折，十分心翳。佢話開局非為業界攞着數，而係追隨世界大趨勢。佢話，新加坡已發力跟上，由副總理親自跟進創業政策，積極引入專業投資者；反觀香港，想搵政府高級官員或專責部門傾吓，諗都唔使諗。
Duncan話，曾試過與內地官員商討科技合作，對方聽完覺得大有可為，但礙於官階唔對等，最終愛莫能助。互聯網專業協會會長洪為民及副會長馮德聰都有出席，洪為民對本港科技發展停滯不前，亦感到無奈。
雲端與流動運算專業人士協會會長陳家豪則提醒港人不要固步自封，佢話依家內地用一部手機就搞掂晒訂機票、酒店、餐廳、送禮物及畀的士錢等，全部喺幾分鐘內完成。佢形容港人生活如在夢中，若不急起直追，恐淹沒喺科技大勢嘅洪流中。
卓妮