有人話，死亡並不可怕，等候死亡來臨最可怕。嗱，香港依家就係處於呢種最可怕嘅狀態嘞。立法會拉布成風，癱瘓施政，損害經濟民生，香港等於慢性自殺，偏偏大家都無可奈何，眼白白睇住香港不斷沉淪，走向滅亡，簡直可悲。
發展局資料顯示，上年度有二十七項基本工程項目撥款申請未獲立法會工務小組委員會或財委會審議，以致工程平均延遲六個月，項目費用最少增加二十五億元。另外，上年度港府基本工程儲備基金轄下約七十個項目撥款申請中，超過五十項申請仍然有待工務小組審議，換言之，受拉布阻撓嘅工程隨時唔止二十七項，好似燒銀紙咁，政客做騷，市民埋單，真係冤哉枉也。
係人都知，工程延誤等於血管閉塞，唔止浪費公帑，整體經濟民生都會受到衝擊。正如有立法會議員話齋，基建工程未能如期推展，建造業首當其衝，工人手停口停，唔通搵拉布議員出糧咩。仲有吖，基建工程關乎民生福祉，延誤嘅結果咪又係市民受害。好似中部水域人工島計劃咁，面積等於四十二個維多利亞公園，主要興建住宅及商業設施，可容納數十萬人口，成為新核心商業區，對解決房屋問題及發展經濟民生嘅作用不言而喻，可惜受阻於立法會，連研究撥款都唔知幾時至批出，講乜都係嘥氣喇。
所以話，香港不進則退，競爭力每況愈下，反對派政客真係「居功至偉」o架。新加坡前總理李光耀病逝，再度引起獅城同香港「雙城競爭」嘅話題，其實，新加坡之所以能夠遠遠拋離香港，除咗因為有李光耀帶領，亦因為有香江政客幫手，佢哋為反對而反對，不斷阻撓施政，拖慢香港發展，喺咁嘅情況下，香港想唔節節後退都幾難喇。難怪有人講笑咁話，香港想加入亞投行，無疑志氣可嘉，但就無自知之明，萬一又受到立法會阻撓，隨時淪為國際笑柄。
唔通香港真係氣數已盡，難逃沉淪厄運？咁就要睇大家點樣抉擇嘞。特首梁振英日前被問到如何拆解管治困局，除咗痛斥拉布議員阻住地球轉，仲呼籲市民踴躍登記做選民，用手中選票將不務正業嘅議員逐出議會。嗱，呢個的確係港人自救嘅方法，尋日多名市民喺立法會舉標語抗議拉布政客，呼籲市民用選票清除議會垃圾，踢走暴民政治，大家知點做喇。
一句講晒，求人不如求己。香港想擺脫沉淪，重回正軌，惟有自己救自己嘅咋！