政情：燒公帑180萬 外訪唔克儉
年薪高達三百四十二萬元嘅教育局局長吳克儉，除咗外號叫「吳得掂」外，其實佢本名「唔」克儉都無講錯，事關經常被人批評亂花公帑四出外訪。教育局書面回覆立法會財務委員會查詢時和盤托出，吳得掂及隨行官員過去三個年度截至本月十五日的外訪使費詳情，原來合共去咗二十三次外訪，共花近一百八十萬元公帑，其中大多數行程歎五星級靚酒店，仲坐商務客位添，真係使公帑唔使本。
花費最勁 單次34萬元
話口未完，吳得掂尋日仍身處加拿大出席「2015教學專業國際高峰會」，外訪應酬真係忙過喺政府總部。文件顯示，自一二年七月至今，吳得掂及隨行官員合共花咗一百七十九萬八千八百六十二元公帑，總共外訪二十三次。其中有六次外訪，每次花費超過十萬元公帑。除咗有一次入住三星級酒店外，其餘大多數都係入住五星級豪華靚酒店，只有六次入住四星級酒店，認真識歎。
其中花費最勁嘅一次係喺一三年三月十日至十七日，嗰次係去加拿大和美國外訪，單次已經使咗逾三十四萬元公帑。其次係去年五月十九日至二十四日去比利時及芬蘭，單次花費逾二十三萬元公帑。去年十一月三日至八日，吳得掂又率領教育界代表團去德國及瑞士，話要深入了解兩地嘅職業教育制度，促進年輕人就業發展。
頻頻歐遊 對港有用否？
至於機票等級，大多數外訪都會訂購商務客位和經濟客位，照咁睇，吳得掂應該係坐商務客位，而隨行官員就坐經濟客位啦。當局就解釋，經考慮參與人員的職級、飛行時間、航班等資料後，根據有關《公務員事務規例》及指引規定，為佢哋提供適當客位等級的機票。其實吳得掂頻頻歐遊外訪，係咪真係對本港教育起到作用，相信大眾市民心中有數。
至於副局長楊潤雄，外訪次數就較吳得掂少好多，過去三年截至今個月十二日，佢只係合共八次外訪，共花十三萬八千多元。其中單次最勁花費七萬八千八百元公帑，是於去年四月二十八日至五月一日去美國出席「2014走出去」會議。