中環出更：AV仁口噏辭職 政制局預留二億
一句說話，隨時令政府庫房無咗兩億元。邊個咁值錢？咪就係立法會議員何俊仁（AV仁）囉！話說早前佢左度右度，終於決定會喺政改表決前辭職，藉此引發變相公投。
AV仁此話一出，政制及內地事務局已經幫佢埋單計數，決定為可能出現嘅補選，預留兩億元做準備。如果AV仁真係辭職，納稅人無辜辜使多兩億元血汗錢。
AV仁本來諗住政改表決後先辭職，但被各界炮轟佢無謂兼無意義後，又心郁轉軚，話有可能喺政改表決前辭職。可能政府都怕真係要搞場補選，所以今個財政年度已預留兩億元搞任何有可能出現嘅補選。大家可能心諗，AV仁都未辭職，到依家都係得個講字，如果個個議員口噏噏就話要預留撥款，真係好唔得閒。
成日「拉到黑」 申撥或觸礁
其實當年泛民搞五區公投，政府唔夠錢搞補選，最後都係上立法會財務委員會申請撥款，本應問題不大，可惜依家財委會「拉布」拉到黑，申請撥款隨時觸礁。
可能因為咁，政制及內地事務局局長譚志源預早申請預留一筆撥款備用，如果AV仁唔辭職，筆錢亦可以留作其他用途。
卓妮