中環出更：鄭志剛籲港青搞文化產業
青年創業係大勢所趨，除走向創新科技懷抱，全國青聯副主席鄭志剛（Adrian）都認為，投身創意文化產業，潛力無限。Adrian日前出席全國青聯酒會時，講起佢鍾意嘅文化藝術，滔滔不絕。佢話香港新一代時尚觸覺敏感，加上受中西文化影響深，搞文化創意產業，應該得心應手，並勉勵青年人要有國際視野，放眼世界。搞文化，都可以係商機。
Adrian舉例話，開設畫廊、設計廊，或開設間特色咖啡店，都有突圍機會。為協助後生仔擴闊視野，Adrian今年準備搞多啲國際交流活動，正計劃去俄羅斯或韓國等地交流，等大家開下眼界。講番「全青」酒會，城中富二代、青年領袖雲集，仲有全國青聯副主席陳仲尼（Rock）。阿Rock一向有為家族基金投資，羊年內地Ａ股步步高升，阿Rock都把握機遇迎上升浪。
「慕光」籌得數百萬元
卓妮轉頭又見到港島婦女聯合會主席張雅麗（Carol），佢透露將加入前立法局議員杜葉錫恩創立嘅慕光英文書院任校董會主席。事關杜太已一百零三歲，係時候準備交棒。「慕光」早前出現財困，Carol話，已成功為該校籌得數百萬元，希望繼續籌多啲。
同場仲見到華南城戰略發展部經理梁煒茵（Iris），佢誕女四個月，已見身形極速回復纖瘦。首次做媽咪，Iris笑言產女過程完全無痛，好恨再生多一個。不過，為搵奶粉錢，佢近年開設食品公司賣臘腸，稍後將喺葵涌設廠生產XO醬，打正香港製造旗號，希望進軍內地市場。
卓妮