亞視人憂王裁員重施故技 亦恐拖累續牌泡湯

「亞視一哥」劉錫賢昨日就直言，對於亞視公布「賣盤」感到「好surprise（驚訝），有人買亞視點都係好事，但係亞視未續牌，大家都知王生（王維基）之前攞唔到牌，入主會唔會令我哋冇牌呢？大家都有咁嘅擔憂。啱啱先有指香港電視股價插水，轉頭就話王生買亞視，真係好多未知之數。」至於會否擔心有裁員潮，他說：「第一係無得驚，第二按照王生港視嘅理念係唔應該有裁員潮，反而擔心無咗個牌。」

藝員：股權轉讓真確性存疑

亞視藝員蔡國威亦對亞視單方面公布事件感疑惑：「首先我想知道究竟佢係買咗幾多百分比，因為呢個係好大決定。」他亦質疑，為何亞視賣盤卻不是由法庭委任的亞視經理人公布？為何王之前被問到是否洽購亞視時卻否認？「呢個（股權轉讓）真確性都係拭目以待！再加上，唔好唔記得王生喺申請電視牌照係有失敗過，依家亞視續牌，怕會有同樣結果。」

被問到會否擔心王維基日後會出手大裁員，前亞姐黎燕珊便直言：「希望唔會出現裁員潮啦！」蔡國威則表示不太擔心裁員，他說：「其實亞視剩低嘅藝員都唔多，但每一個都獨當一面係專業嘅藝人，我自己就唔擔心，因為我覺得佢反而更加需要人手，亦都會將兩班人合併，睇吓會唔會擦出一啲新火花。」

前亞姐宮雪花對王維基的能力存疑：「王維基再三否認（買亞視）多少次？商場無真話，王維基想佔領香港半個大氣層之心路人皆知。說不定，他異峰突起，搞出點名堂來。他如果也和別人一樣經營，我覺得也不會好到哪裏。亞視要有翻天覆地變化，才能救到命。他究竟有多大魄力，我沒有親身體會到！」亞視出身的杜汶澤則認為有競爭才有進步，希望王維基最終可成功，為觀眾帶來更多選擇！」他更寄語王維基「可正正經經做生意，別像王征一樣，一塌糊塗！」

港視股價上升 無綫「使錢打仗」

此外，王維基旗下的香港電視昨收報3.07元，升3.716%，而港視昨晚在美國預託證券ADR更一度報3.98元，較本港收市升近三成。騰祺基金管理投資管理董事沈慶洪認為，亞視如成功售股予香港電視，將增加本地電視行業競爭，最受影響的應是無綫。沈指，明年亦有奧運轉播，相信無綫仍需「使錢來打仗」，加上廣告競爭激烈，電視廣告價格有壓力，直接影響無綫未來收入。反觀香港電視或可因入股亞視消息帶動而有炒作藉口，股價或可彈升15%，惟亞視未來會否獲續牌仍是未知之數，風險不少。