一件污，兩件穢，三件無所謂。民航處管理混亂，烏煙瘴氣，醜聞多到數唔晒，加上知錯不改，更係醜上加醜。
話說民航處被本報連環踢爆大花筒，豪花公帑將新總部打造成「豪華娛樂城」，又被揭發擅自喺大樓擴建一萬六千呎預留空間後又丟空唔用，引起社會嘩然，連審計署亦發表報告炮轟。如果民航官僚知衰，應該收斂至係，點知佢哋唔止冇收斂，反而變本加厲，將其中面積最大、佔地三千呎僭建空間闢作太極班場地，連處長羅崇文夫人都成為座上客，先天下之樂而樂，問你服未。
有民航處前員工向本報爆料，太極班學員享有特權，午飯時間長過其他員工，有人因為頂唔順部門嘅種種陋習而離職。正如有公務員團體話齋，好多公務員都做到嗌救命，邊得閒參加康樂活動吖。再講喇，唔少部門空間有限，有地方都用嚟做辦公室喇。
正所謂，同人唔同命，同遮唔同柄，民航處出名無王管，其他部門唔恨得咁多o架喇。之前立法會報告形容民航處係「獨立王國」，一啲都冇誇張。話時話，民航處嘅劣迹仲厚過電話簿，除咗打造超豪總部，仲有另一單醜聞畀立法會帳委會查緊。該處四年前豪花十五億元購入嘅新空管系統問題多多，安全成疑，拖到依家都未用得。更離譜嘅係，民航處唔向承辦商索償不特止，反而倒貼七千萬元，簡直荒天下之大謬。
面對種種質疑，處長羅崇文唔止冇認錯，仲繼續死撐，指如果對承辦商提高罰款，標書嘅金額會相應提升，甚至無人入標；又話物流署同律政署都有參與標書商討工作咁話。總之就係左賴右賴，藉口多多，連帳委會主席都睇唔過眼，嚴斥佢講大話，拖其他部門落水。
所以話，官僚無恥，有時唔到你唔服o架。當年「絕代雙貪」雖然作惡多端，但畀人踢爆後都要死死氣向公眾道歉，唯獨羅崇文面對全城炮轟，仲可以若無其事，好官我自為之，令人嘆為觀止。
點講都好喇，民航處新空管系統怕且都幾難如期一六年投入運作o架嘞，有人建議港府與其繼續倒貼，倒不如乾脆斬纜止蝕喎。其實計功夫茶話齋，最應該被斬纜嘅係民航處嘅庸官劣吏，家陣港府民望低殘，再唔執行家法，將厚顏無恥嘅庸官掃地出門，盞進一步激起民怨嘅咋！