政情：「芝」撐建三跑 倡設特賣場吸財
興建機場第三條跑道嘅計劃最近掀起全城熱話，一千四百億元工程造價，加上建議徵收一百八十元機場建設稅，惹來公眾極大爭議。新華旅遊董事總經理楊章桂芝（Cindy）認為，開源興建跑道，唔一定要伸手問市民攞錢，喺機場設立名牌Outlet（特賣場）「吸財」仲划算，既吸引本地及海外旅客，又賺到錢，咁就有本興建新跑道，毋須擾民。
Cindy日前出席專業及資深行政人員協會午宴，講起「三跑」，佢話機場嘅升降量的確飽和，搞到無位畀飛機升降，旅客被迫搭凌晨機，所以佢好贊成起多一條跑道。不過，講到問市民攞錢，佢就有保留，若一旦開徵機場建設費，就要豁免逗留機場不足二十四小時嘅過境旅客。長短途旅客方面，亦應採取唔同徵費，若然「一刀切」收錢，對短線旅客唔多公平喎。