政情：「鋒帆」會晤 暑假密謀再佔？
搞佔領嘅學民思潮召集人黃之鋒尋日飛赴台灣高雄與太陽花學運領袖林飛帆會晤。政改方案下月中公布，緊接五、六月立法會亦會表決改政方案，有政界中人已預言呢段時間會有大型抗爭，唔通黃之鋒赴台取經，為暑假新一波佔領行動做準備？
二人會面，例牌對比港、台兩場學運嘅分別，黃之鋒坦言佔領行動後，香港後生仔出現「另類思考」，開始唔相信組織活動，只信自己，同台灣好唔同。佢同時鬧爆民主黨班「阿叔、阿姨」唔了解年輕人想法，間接令佔領行動無法成功；對比台灣民進黨，民主黨已經冇影響力，支持度亦跌到得番兩成。
林飛帆就話，兩地之間嘅運動經驗係相互學習，台灣係做咗先講、「先佔先贏」，相反香港係先協調、再行動，形成有趣對比，佢仲話要向香港學習添。唔通黃之鋒都打算學習台灣「先佔先贏」，以為佔領咗先就當贏？