政情：政府新聞網fb點擊率低 嘥錢
唔少政界人士或政團都會喺社交媒體facebook（fb）開設專頁宣傳，政府新聞處去年都趕上潮流開設《政府新聞網》fb專頁，趁機宣傳同推銷政策。不過，專頁開咗唔夠四個月，都係得四千三百多人讚好（Like），帖子嘅點擊率同讚好次數都差強人意，不但達唔到推銷政策之效，仲有嘥公帑之嫌，睇怕政府新聞處處長聶德權都要諗吓計谷多啲點擊率交數至得嘞。
立法會議員范國威就財政預算案提出書面查詢，要求當局交代政府新聞處有否為社交媒體覆蓋率、觸及率等訂立指標，又要求交代讚好fb專頁用戶年齡、性別等分布數字同比率。新聞處回應話，該處喺一○年五月設立YouTube頻道，同年七月開設《政府新聞網》Twitter及微博帳戶，去年十一月先至開設fb專頁。
宣傳「家是香港」 貴過施政報告
喺fb專頁開設首兩個月內，分別錄得四萬六千二百多次及十三萬一千一百多次點擊率，而截至本月初，最多人讚好專頁嘅年齡組別為廿五至三十四歲，比例佔百分之三十三。而喺二月初至三月初一個月內，總共有六千七百四十五個fb用戶讚好、回應或分享專頁帖子，相比起其他機構嘅專頁，成績非常麻麻，真係唔知點樣宣傳政策。
另外，喺一○至一四年，新聞處合共製作三十六套電視宣傳短片及三十條電台宣傳聲帶，總開支約為一千二百八十九萬元，當中單係為咗宣傳「家是香港」及製作主題曲，就已經使咗成一百四十萬元，比去年用作宣傳《施政報告》仲要多。
該處今年獲額外增撥2.6千萬
財政預算案喺一五一六年度額外向新聞處增撥二千六百萬元，新聞處話當中二千萬元將會用作對外推廣之用，餘下六百萬元就會喺本地電視、電台大賣廣告，繼續宣傳政府政策。撥款資源增加，唔知成效又會否相應提升呢？