中環出更：青委會出席率 青不如中
政府委任嘅青年事務委員會（青委會）經常被人質疑委員會中部分成員年紀唔夠年輕，覺得佢哋嘅意見未必可以代表到青少聲音。根據政府提供有關青委會會議出席率，發現當中幾位青年委員，如北區區議員劉國勳、曾經歷八仙嶺山火嘅張潤衡等出席率都差強人意，反而中年及有番咁上下年紀嘅前主席陳振彬、前委員警務處前處長李明逵、黃大仙區議員莫仲輝等出席率就滿分，唔通真係「青不如中」﹖
根據青委會委員過去三年嘅會議出席率資料，發現部分年青委員委員嘅出席率雖然未至於包尾，但真係差強人意，好似「八十後」嘅前委員鄺禹韜同「衡仔」張潤衡，三年來平均出席率分別只有兩成半同五成，而「九十後」嘅委員蕭景威亦只得約五成八，同樣都算青年一輩嘅劉國勳出席率亦都只係得五成。
前主席陳振彬零缺席
相反，一眾有番咁上下「歷煉」嘅委員嘅出席率就「靚」好多喇。除咗時任委員會主席嘅陳振彬出席率係百分之百外，李明逵、元朗區議員鄧廣成、莫仲輝、青年協會副總幹事馮丹薇及執業大律師范凱傑嘅出席率都係爆燈。而灣仔區議員伍婉婷嘅出席率都有近九成二。
卓妮