中環出更：父喜遊列國 黃進達力追步伐
所謂「三年一個代溝」，年輕人同父母溝通時出現唔啱嘴形嘅情況並唔出奇，如果一齊工作就更加要時間磨合。卓妮日前喺青年工商界晚宴上見到好多名二代嘅青年才俊，其中康泰旅行社董事總經理黃進達（Jason）就講到父親黃士心形象鮮明兼主意多多，佢話接手家族生意時，其實都花咗唔少心機先追得上父親。
咪以為上一代一定比較保守，可能係從事旅遊業關係，Jason話父親特別鍾意搜羅新事物，每年都一定要去最少四個唔同地方，睇吓有咩新奇刺激嘅發現，又會寫書分享遊歷，分分鐘活潑過佢，笑言自己努力到近年先追趕到父親嘅步伐。
李美辰父女性格大不同
中華出入口商會常務會董李美辰亦有類似情況，佢透露父親、和富社會企業會長李宗德性格比較急，樣樣嘢都會諗到就想即刻做。而佢就啱啱相反，因為讀過公共政策，凡事都要跟足程序按部就班，有時爸爸一諗到新意念，佢就會即刻幫手做資料搜集，搵齊每個步驟應點做先開始實行，兩種性格反而相輔相成。
不過，亦有部分長輩較為保守。為咗令父親更貼近新一代嘅生活方式，「糧油大王」明泰食品董事長兼首席執行官李廣林兒子李豐年，就搵咗人教爸爸用智能電話，等佢更了解網絡營商等策略。中華出入口商會青年部成員江美儀參與家族生意後，就遇到有下屬年紀比自己大嘅問題，但佢話只要做好手頭上每件事，時間耐咗就會得到年長同事尊重。
卓妮