怪事年年有，今年特別多，消防頭盔遇熱即熔變成「葡撻」，大家見過未？未見過呢，消防處花費巨資購買嘅最新頭盔咪就係咁嘅貨色囉。
話說旺角東海大廈日前發生奪命大火，兩名市民被烈火吞噬固然令人惋惜，而消防員嘅新頭盔抵受唔住高溫同樣令人關注。從流傳嘅相片可以見到，消防頭盔居然變色起泡，帽徽熔化，好似啱啱出爐嘅蛋撻咁，被消防員譏為「葡撻頭盔」，「用完即棄」。
其實呢批頭盔唔簡單o架，係法國製造嘅來路貨，消防處斥資二千五百萬元購入九千幾個，點知虛有其表，用咗唔夠一個月就甩甩漏漏，唔怪得有前線人員話舊款頭盔比新款更耐用喇。試諗吓，消防頭盔不堪一擊，消防員自身難保，又點樣救火救人呢？
消防處仲死撐，指火場溫度可高達攝氏四百度或以上，頭盔外層油漆因為高溫膨脹而剝落屬於正常，又話承辦商已經確認頭盔結構冇受影響，但仲要詳細檢查喎。嗱，呢啲咪就係不負責任囉，正如有立法會議員質疑，新頭盔經歷一般家居火警已經變燶起泡，遇到更高級別火警豈不是危危乎？
議員嘅質疑唔係冇理由，人命關天，點可以咁求求其其o架。話時話，消防處烏龍百出，入錯貨早就唔係新聞咯。好似○五年斥資七億元引入第三代調派系統咁吖，投入使用以來，幾乎每月都出現唔同程度故障，曾試過四日內三度死機，亦試過亂點鴛鴦指示救護車前往錯誤地點，幾乎因為延誤救治而搞出人命。
仲有吖，○八年消防處斥資七千幾萬元購入十七架法國製油壓升降台消防車，點知車輛抵港驗收至發現油溫過熱令水泵力度不足，水柱軟弱無力，其中一架車嘅消防喉更喺訓練時突然斷開，需即時停用其他同類型嘅消防車，並終止與供應商嘅合約，結果反而被對方入稟索償。小數怕長計，過去十年消防處頻頻入錯貨，最少枉花近十億元公帑，你話係咪混帳吖。
講起消防處嘅烏龍，幾日幾夜都講唔完，除咗入錯貨當食生菜，消防員裝備問題多多，唔止影響救援，隨時危及前線同事添。當年造成四死五十五傷嘅旺角嘉禾大廈五級大火，死者包括兩名消防員，就係因為當時消防員使用嘅通訊設備落後，無法喺惡劣環境中保持溝通。如果唔係因為太離譜，死因庭都唔會要求消防處即時更新通訊系統喇。
講到尾，消防處醜聞多籮籮，皆因消防官僚渾渾噩噩，敷衍塞責。頭盔變葡撻，只係消防管理混亂嘅冰山一角咋！