政情：黃靜文突辭任廠商會CEO
幾年前開始，各大傳統商會都愛以高薪撬走前政府高官，幫商會出任要職，貪佢哋有商界人脈，又熟悉政府運作。好似政制及內地事務局前副局長黃靜文（Adeline），前年就過咗去中華廠商聯合會（廠商會）做行政總裁（CEO），開頭都做得好哋哋，Adeline亦講到慶幸自己不在官場，廠商會份工好適合佢。不過，估唔到佢做唔夠兩年就閃電辭職，並已向會董會提出請辭。
稱私人理由離職
Adeline自從政府換屆後就無再做副局長，之後佢「過冷河」一年後，上屆廠商會會長施榮懷前年就親自搵佢入廠商會做CEO，換言之即係擔任大內總管。其實去年底廠商會換屆時，由李秀恒接替施榮懷做會長，都有人懷疑過Adeline會否過渡至新一屆嘅廠商會班子，但當時未見Adeline有咩異樣，但事隔唔夠幾個月，已經出現變數。我哋打過畀Adeline，佢話係以私人理由辭職。