政府委員會開完一個又一個，過去都會喺委員會內搵人「升呢」坐正主席，但自從願意走入「熱廚房」嘅人買少見少，主席工作吃力亦未必討好。好似執業律師郭琳廣咁，我哋聽聞佢接掌獨立監察警方處理投訴委員會（監警會）短短大半年，有傳委員會內嘅泛民委員不獲重視，即使立場親建制嘅委員亦各走兩極。
據了解，郭琳廣自從獲「空降」接任主席，反而同年初先獲委任嘅新委員行得更埋，對「老鬼」意見唔多入耳；其次係佢「貴人事忙」。有委員話，前主席翟紹唐（翟少）過去開會，為力爭最大多數共識往往會超時開會，但依家郭琳廣除咗要求準時完會，遇到爭議時動不動就要求委員投票，少數服從多數就當解決問題。
有「老鬼」透露，至今依然定期約翟少及已經離隊嘅委員敍舊，至於郭琳廣，大家同枱食飯嘅次數幾乎係零。委員指控郭琳廣嘅「罪名」好難對質，但至少郭琳廣要認真諗吓，點樣修補同新舊委員嘅關係嘞。