政情：「袋住先」民調真係怕做？
政改第二階段諮詢結果將於下月公布，雖然二十七名泛民主派議員表明會否決政改方案，但代表泛民政黨嘅真普選聯盟（真普聯）似乎前路未明，最近只係靠委託香港大學民意研究計劃做民調，民調做完又做，而今個月嘅民調同兩個月前差唔多，都係得到「阿媽係女人」嘅結論，不但浪費資源，仲證明佢哋連政改「袋住先」嘅民調都唔敢做，莫非擔心結果真係多數市民支持「袋住先」，逼泛民急轉軚？
真普聯本月民調再度問及市民對人大常委「八三一」決定嘅意見，咁問法，結果當然唔夠客觀啦，但點解唔問吓市民係咪支持「袋住先」呢？其實港大民意研究計劃總監鍾庭耀之前提出全民投票計劃，用「公投」方式調查市民對「八三一」框架下政改方案嘅支持度，而港大法律系教授陳弘毅亦提出公投，但泛民都係無乜反應，莫非同真普聯一樣，都係擔心多數市民支持「袋住先」？
鍾庭耀暗寸泛民計較
泛民飯盒會成員早幾日同鍾庭耀會面，但雙方會後仍未可以達成共識，泛民各黨表明對公投存有保留。鍾庭耀可能知道泛民唔多支持計劃，尋日打定輸數話，至今仍未有一名議員表明會根據投票結果，認為就算舉行公投，都無乜意義。佢相信泛民議員之所以唔支持佢嘅計劃，可能係要考慮日後選舉嘅政治籌碼，暗寸泛民太計較得失。
鄭宇碩話要再考慮吓
真普聯召集人鄭宇碩就解釋話，坊間唔少機構都有做關於「袋住先」嘅民意調查，相信多佢一個唔多，少佢一個唔少。不過，佢話會考慮做有關「袋住先」嘅調查，但就要同聯盟成員傾吓先喎。睇番佢哋一月做過嘅民調，民意轉向唔明顯，其實真普聯會唔會覺得，呢啲民調做完又做為咗咩呢？莫非務求要使晒各方捐畀佢哋嘅錢為止？