中環出更：方剛白了頭 蒙德揚驚做議員
立法會批發及零售界議員方剛來屆將退下火線，到底邊個接任議席，業界一直有好多傳聞，早前就傳出「電飯煲大王」蒙民偉之子、信興集團主席蒙德揚有興趣。信興集團日前舉行年度傳媒聚會，蒙德揚就借呢個機會澄清，話自己對做議員無乜興趣，仲話見到方剛做議員做到頭髮都白晒，點會唔驚呢？
有人鼓勵參選 當面拒絕
方剛當然想捧自己黨友接棒，但目前形勢風高浪急，不時流傳有零售界老前輩想一嘗做立法會議員滋味，早前就傳出蒙德揚呢個名字。蒙德揚現時只係五十出頭，已係信興集團主席兼行政總裁，信興又係行內龍頭，喺批發及零售界有超然地位，但佢就表明心迹話無乜興趣做議員。
不過，空穴來風、未必無因，如果佢無任何動作，到底又點解會有呢個傳聞？蒙德揚好坦白，話早前的確有位人士當面鼓勵佢參選，但成個對話不足一分鐘，而佢亦表明無意，估唔到之後就被流傳佢有意參選，唔通嗰位人兄都有興趣參選，所以想人哋「見光死」，令自己少咁個對手？
卓妮