中環出更：財爺擎「手槍」射拉布三子
特首梁振英（CY）去年十月因為佔領行動，推遲咗出席立法會答問大會，所以尋日答問大會算係補番數，但火花欠奉。不過，財政司司長曾俊華（鬍鬚曾）散會離開時，遇上「拉布」三子包括社民連梁國雄（長毛）、人民力量陳志全（慢必）及陳偉業（大舊），鬍鬚曾見三子吵吵鬧鬧，於是用雙手做出開槍手勢，射向三子。
話說大舊不滿CY喺答問大會上有關機場第三條跑道問題嘅回應，於是趁CY等人離開時表達不滿，又向同行嘅鬍鬚曾話：「唉，不如同你講，反正佢（CY）都唔應」。雖然鬍鬚曾就笑笑口，用雙手做出槍嘅手勢，射向拉布三子。其實鬍鬚曾上月到立法會宣讀財政預算案時，長毛就向佢投擲寫上「未來基金」嘅磚頭道具，而長毛被逐離場時，鬍鬚曾就向律政司司長袁國強講咗一句：「It's a good break. I need that.（我正需要休息時間）」。
特首答問會 徐英偉冇影
另外，一班行政會議成員以至副局長及政治助理都專程去答問大會撐場，但就唔見近日就辭職問題擾擾攘攘嘅民政事務局政助徐英偉，近日流傳因為佢要返「娘家」民建聯擔任總幹事一職，政治委任官員離職後工作諮詢委員會就列出唔少離職再就業嘅「辣條款」，搞到佢要焗住留任政助，認真(火羅)爆，唔知係咪因為咁，佢尋日缺席避吓風頭呢？
除咗一班副局長及政助，卓妮仲見到行會新貴楊偉雄，佢一開始就同資深行會成員廖長城密斟，又全程專心聆聽。而另一行會成員李國章（阿瑟王）就同張志剛密斟，兩人分別係港大校委會成員及教資會成員，睇嚟話題點都離唔開近期港大風波以至大專議題嘞。不過，唔知係咪因為前晚港大校委會開會開到好夜，阿瑟王聽到接近一個鐘後，就決定閉目養神足足二十分鐘，就算大舊大聲發問都冇乜反應。
卓妮