魯迅曾經講過，「叭兒狗往往比牠的主人更嚴厲。」真係一啲都冇講錯，奴才有時仲惡過主人o架。
呢，人稱淫賤黎嘅壹傳媒老闆黎智英舊年十一月喺金鐘佔領區「私家皇座」抽水兼扮指揮，三名市民睇唔過眼，怒斥佢係「賣國賊」，跟住淋屎尿掟豬雜，搞到淫賤黎臭氣熏天，狼狽而逃。當時佔領區糾察長郭紹傑及民主黨前西貢區議員柯耀林忠心護主，急急撲出來制服涉事者，後來被警方以涉嫌公眾地方打架拘捕，兩人玩「拒保」之下，近日獲警方通知，話唔會就該事件提出檢控，並邀約兩人再到警署，以證人身份就其餘三人涉嫌淋屎尿掟豬雜一事錄取口供喎。
咁都得？淫賤黎之所以畀人淋屎尿掟豬雜，皆因佢反中亂港，禍港殃民，有人忍無可忍而贈予「臭彈」，完全係出於義憤，淫賤黎可以講係咎由自取，應有此報。正如有人話齋，如果係抗戰時期，漢奸賣國賊人人得而誅之，點止淋屎尿掟豬雜咁簡單。依家雖然係和平時期，香港係法治之區，唔可以使用暴力啫，但唔表示漢奸妖孽可以為所欲為，逍遙法外o架。
呢件事最離奇嘅係，郭紹傑身為公務員兼港九拯溺員工會副主席，涉嫌參與非法佔中已經好有問題，仲擔任金鐘佔領區糾察長，變相充當淫賤黎「私人保鏢」，更加匪夷所思。郭紹傑聲稱「跌斷鎖骨」，獲相關部門批准超過一年嘅工傷假，佢一邊出政府糧，一邊佔中反政府，而且表現「神勇」，點睇都唔似鎖骨有問題，更唔似需要休息年幾。
所以話，就算唔計涉嫌公眾地方打架呢筆，當局都應該調查係咪有人涉嫌呃公帑。不可不知，超過一年嘅有薪假，條數絕對唔少，唔可以就咁算數o架。再講喇，當局是非不分，黑白顛倒，不值漢奸所為嘅市民面臨被檢控，而參與非法佔中者就獲得放生，咁仲有天理嘅。
無論點都好，佔領行動搞到香港烏煙瘴氣，七國咁亂，呢班牛鬼蛇神絕對唔可以輕輕放過。話時話，佔領已結束咁耐，警方先後展開三波拘捕行動，佔中搞手及幕後黑手被一網打盡，但律政司就遲遲唔落案檢控，究竟仲要拖到幾時呢？唔通又係不了了之？咪話功夫茶唔提醒吖，政改問題仲未解決，爭議仲未平息，反對派正養精蓄銳，隨時準備捲土重來，如果當局有法不依，繼續姑息養奸，遲早自食苦果嘅咋。正所謂，黃台之瓜，何堪再摘，香港得番半條命，如果再來一場佔領之亂咯喎，想唔死都幾難！