政情：今日你上鏡：送病兒返學 鄭泳舜大懵

早幾日下午大約四點半鐘，我哋見到深水埗區議員鄭泳舜（Vincent）急急腳行入尖沙咀一間酒店，然後不停講電話，神情好似幾緊張，唔知發生咩事呢？育有三名兒子嘅Vincent笑笑口話，八歲大仔發咗燒，但佢講起件事有啲自責。話說當日朝早佢送大仔返學時，見個仔唔係好舒服，但唔為意照送個仔上校車，點知一上車就嘔，返學校後又嘔咗幾次兼且發燒。Vincent話，依家流感咁犀利，真係唔可掉以輕心喎。其實如果唔係佢咁矇查查，可能囝囝唔使又燒又嘔咁辛苦囉！