政情：「皇」婿辭職備戰區選？
區議會選舉中，除咗建制、泛民兩大陣營，新界鄉事派亦不容忽視，其中幾乎由鄉事揸莊嘅離島區議會亦預計大執位。有傳鄉議局主席劉皇發女婿、離島委任區議員余漢坤於年底選舉會接任即將退休、大嶼山選區嘅黃福根，仲傳佢有意取代周玉堂接任區議會主席添。雖然余漢坤一直對傳聞不置可否，但據知佢上月不惜辭任工作近六年嘅信和集團董事總經理，令部署選舉嘅傳聞更甚囂塵上。
傳大嶼山選區有人挑機
發叔部署女婿上位唔係新聞，但余漢坤身為當事人至今依然態度曖昧，亦有傳大嶼山選區另有有心人挑機攔截，令余漢坤嘅直選之路更為崎嶇，不得不破釜沉舟，辭職專心選戰。我哋問過余漢坤，佢坦言係上月趁年三十晚離開信和，強調同老闆完全冇不和，一直合作愉快，只係希望工作上可以轉換吓跑道，計劃休息半年再決定去向，期間會同太太遠赴不丹休息吓。休息半年，難怪令人猜疑辭職係部署選舉。
不過，余指最近有大企業向佢招手，話唔定五月返新工；篤信佛學嘅佢相信「一步一腳印」，唔諗太長遠嘅事。
接掌區會要問過周玉堂
假設佢參選嘅傳聞真確，即使佢搵到選區落腳，要踏上區議會主席之路都要問過現任主席周玉堂，皆因周玉堂日前先連任南丫島南段鄉委會主席，意味着將會續任區議會當然議員，唔知會否咁順攤讓位畀世姪呢？所以余漢坤若要更上一層樓，睇怕要同世叔伯拗過手瓜至得。
除咗余漢坤要搵地方落腳，另一離島委任區議員、民建聯（民記）周浩鼎亦盛傳會接任黨友周轉香位於東涌南嘅直選議席，爭取喺區議會多坐一會。
早前我哋講過民記推出「瘦雞餐」計劃，等一啲資深區議員退位畀後生一輩，唔知香姐係咪接受呢個計劃呢？不過，選舉嘅嘢唔到最後一刻都唔知會係點，大家真係要拭目以待。