中環出更：鬼祟揸車出街 貪曾心虛

貪曾唔知係咪想掩人耳目，尋日中午時分外出並無搵司機接載，反而鬼鬼祟祟開動其廿幾年車齡嘅殘舊房車離開淺水灣道寓所。最終卓妮發現佢原來去咗山光道馬會會所，唔通佢去馬會要見重要人物，所以咁鬼祟？

遇記者即又遮又掩

平生不做虧心事，半夜敲門也不驚。可能貪曾本身心虛，駛去馬會期間，沿途不時望住倒後鏡，好似怕人跟蹤咁。當佢駛入馬會停車場時，可能發現卓妮喺度，即時用手遮掩，又嘗試將座位前嘅太陽擋放低，諗住唔使被人影到佢個樣。

本來我哋想繼續直擊貪曾入馬會嘅一舉一動，睇吓佢到底搞邊科，但有馬會保安幫貪曾擋駕，令佢無驚無險入咗馬會。話時話，如果係正常社交活動，使乜咁鬼祟呢？又遮又掩好似唔得光咁！根據車輛登記顯示，貪曾架老爺車於八八年登記，成廿幾年車齡，如果一個唔好彩中途「跪低」，貪曾要企喺條街等救車時，想唔被人見到都幾難囉！

卓妮