中環出更：座駕接財爺 違泊20分鐘
財政司司長曾俊華（鬍鬚曾）發表完財政預算案後，得閒咗好多，呢兩星期都先後見佢中午到中環香港會所食飯。本來食飯無咩特別，但佢似乎對鏡頭有啲虛怯，原本企喺門口等候其「FS」御用座駕接載，但一見卓妮就縮返入香港會所，當佢見座駕駛過時，又趕唔切出去截車，好似玩捉迷藏咁。鬍鬚曾尋日又去香港會所食晏，今次見佢把心一橫，衝出去雙黃線以外上車，認真危險。
眾所周知，中午時分嘅香港會所門外好多人上落車，當時會所對面嘅上落客位置都泊滿晒車，鬍鬚曾嘅座駕竟然大搖大擺咁停喺上落客位置外嘅馬路正中心，位處雙黃線。卓妮開頭心諗，鬍鬚曾可能就快食完飯上車，咁架FS座駕都係偷吓雞側側膊唔多覺，點知其座駕一停就停咗成十分鐘，但仍未見鬍鬚曾蹤影，好彩隔籬有多一條行車線，否則搞到大塞車都似。
雙黃線外路中心上客
再過多十分鐘，先至見到鬍鬚曾同佢新聞秘書慢慢由香港會所行出來，可能佢唔知道架車已經等咗二十分鐘，就算卓妮截住佢問嘢，鬍鬚曾都係笑笑口無回應，仲一個箭步行去路中心、雙黃線上車。卓妮聽聞特首同三位司長嘅座駕，的確有特權可以喺雙黃線同巴士專線停車上落客，但只限於短暫時間，依家鬍鬚曾架「FS」座駕違泊二十分鐘，佢仲要衝出馬路上車，險象環生，似乎好難講得通喎。
卓妮