港府終於拍板興建香港國際機場第三條跑道，不過拍板唔等於開工，就算開得工亦唔代表工程可以如期完成。好簡單，建造成本及空域限制問題引起好大爭議，港府就算繞得過立法會拉布阻撓，卻避不過市民質疑，借用巴士阿叔嘅金句，問題「未解決」！
先講造價已經攞你命，嗱，齋估已經高達一千四百幾億元，「榮膺」本港歷來最貴單一基建項目。一個唔好彩拖一年半載甚至更耐，閒閒哋多出幾百億，納稅人焗住硬啃，你話唔驚就假。唔係咩，港府基建延誤當食生菜，淨係講三跑環評司法覆核呢一單，工程隨時一拖再拖，變成資金無底深潭。
仲有喎，港府肥到着唔到襪，起三跑唔係冇錢，但係為咗避開立法會，惟有偷雞用所謂自行融資方案，仲要「用者自付」，向旅客徵收每人一百八十元機場建設費及增加航空公司收費嚟籌措建造費，擺明將成本轉嫁畀旅客，未見官先打三十大板，徵費唔止擾民，更影響機場嘅競爭力，試問市民點收貨吖？
有學者就講得啱嘞，港府為咗避開反對派拉布，利用特殊融資方式繞過立法會，等於削足就履，擔心日後重要基建項目亦會被拖慢，或者未必採用最好方案興建。你話係咪得不償失吖！
睇下市民點講喇，「東方報業民意調查」結果顯示，對於當局建議向乘客收取三跑建設費，大部分市民有怨言，其中三成二受訪者認為，機管局有財力，唔應該增加用家負擔；近三成認為徵費水平太高。對於三跑成為全港最貴單一基建項目，三成七受訪市民認為政府要加強透明度，四分之一人認為當局監管不力，恐怕淪為大白象。
係呀，三跑完全有機會變成大白象o架。珠三角一共有五個機場，個個都希望成為區內航空樞紐，個個都增建跑道，問題係空域就得咁大，點分配都有爭議。但人哋基建話做就做，深圳已有第三條跑道，廣州更建緊第五條跑道，香港一味紙上談兵，等到建成第三條跑道，航空樞紐地位早已拱手讓人喇，分得到新空域又點啫？何況港府淨係講已獲內地支持三跑云云，無憑無據，得個講字。
正如學者話齋，如果三跑遲遲未落實，香港將會被取代，物流業亦難多元發展，經濟產業單一化，最終獨沽金融地產，令香港失去優勢。上述調查發現，對呢個問題，四成六受訪者認為香港形勢落後於人，二成三人指香港會失去航空樞紐地位。
都係嗰句，逆水行舟，不進則退。從香港發展角度考慮，興建三跑有助提升競爭力，弊在港府眼高手低，計劃不周又黑箱作業，加上社會泛政治化，乜都拗餐飽，有乜好嘢都變成明日黃花喇。講到尾，如果當局唔拿拿臨就市民嘅關注坦誠交代，勢必添煩添亂，最怕項目未能造福市民，已經變成另一個政治炸彈。