區議會選舉年底舉行，按傳統無論建制派或泛民主派都會各自協調區選，避免撞區浪費彈藥。不過，隨着新民黨等中小型政黨誕生，議席僧多粥少下，做「細」嘅一係接受命運安排，一係就做「曳仔」同建制大黨正面交鋒。其中經民聯近年銳意開拓新界東、新界西及九龍西版圖，據悉佢哋拒絕認命，違反協調機制四處派人空降挑機，惹起建制大黨不滿，未搶到議席已犯眾憎。
其中經民聯社區發展幹事、靚仔律師申偉基（Ricky）空降火炭選區，硬撼當區區議員龐愛蘭，打算以律師對藥劑師「格食格」爭票。Ricky更意有所指話，較區議員淨係幫政府、財團講說話，佢會主打地區議題，為市民發聲，戰意甚濃。
另一戰區就係民建聯（民記）余倩雯自動當選嘅沙田禾輋邨，身兼經民聯成員嘅沙田鄉事委員會主席莫錦貴去年喺該邨開設辦事處暨沙田支部，明顯衝着民記而來，據悉佢哋派出沙田社區幹事李德華挑機。傳聞佢哋又懶理公民力量一直部署收復被新民主同盟丘文俊佔據嘅沙田乙明選區，一於做「第三者」介入建制泛民之爭，冀建制大黨縮沙，做壞規矩，下場係點真係拭目以待。