政情：咁啱！「雙黃」法國巧遇
世界真細小！中華廠商聯合會常務會董黃家和（Simon）早前偕女兒去法國過新年，咁啱得咁蹺，接啱同永遠名譽會長黃友嘉搭埋同一班機往返，認真有緣。Simon話，佢哋唔知道對方會去法國，喺出發去到機場後先巧遇，當然不忘喺機場影番張合照啦。
家和參觀酒莊
Simon話，今次係帶女兒去佢兩年前購入、位於法國貝吉拉（Bergerac）嘅酒莊參觀及遊玩，又喺酒莊內一棵約三百年樹齡的巨大紅木前留影。由於購入酒莊時間尚短，佢話每次唔同季節去嘅時候，見到唔同景色，依然覺得充滿驚喜。
友嘉玩自駕遊
至於黃友嘉就同家人一齊去法國自駕遊，佢見以往通常都係去巴黎購物居多，所以今次就揀咗去多幾個城市，包括里昂、尼斯及馬賽等地，參觀唔同景點。不過，由於各景點相距甚遠，佢七日駕駛超過三千公里，路費都花咗二、三千元，相比德國及西班牙自駕遊比較抵喎。