政情：馬斐森唔揣測李國章做主席否
行政會議成員兼中文大學前校長李國章，前日被委任為香港大學校務委員會成員，外間盛傳佢好可能接替十一月退任嘅梁智鴻擔任校委會主席。港大校長馬斐森尋日話，唔會揣測李國章會唔會做主席，而主席人選亦都唔到佢決定，但李國章喺學術、醫學同政治上都有有豐富經驗，係合資格嘅主席人選（Well-qualified candidate）。
歡迎加入港大校委會
馬斐森尋日同中大校長沈祖堯一齊主持「兩大校長盃」開球禮，佢話好歡迎李國章加入校委會，有信心大家可以好好合作，期望可以貢獻校委會。李國章早年出任教統局局長同中大校長時作風強悍，馬斐森覺得李國章有強烈個人意見係好事，可以促進討論。對於港大學生會憂慮李國章會影響院校自主，馬斐森指保護院校自主係整個委員會嘅集體責任。至於副校長任命問題，馬斐森話仍然要等物色委員會調查。