政情：黃洋達 阿Man隻揪靠把口
「忠義民團」阿Man上星期向熱血公民（熱血）黃洋達下戰書，要求佢應邀上擂台對決。黃洋達上次聲稱「唔知醒」未有出現接信，「忠義民團」二十多名成員尋日就踩上熱血九龍灣辦公室，再下戰書兼一齊討論拳賽細節。埋身肉搏未開始，黃洋達同阿Man率先就體重、場地、資金等細節展開「牙骹戰」，足足拗咗一個鐘，阿Man口頭同意提供二十萬元按金，兩人一齊簽咗「擂台賽事意向書」，但到時打唔打得成真係未知之數。
「瞓醒」嘅黃洋達尋日一早預備枱櫈講數，更加有身穿道袍嘅熱血成員係辦公室門口恭候，而阿Man就係二十幾名「忠義民團」成員陪同下到場。佢哋初步同意比賽按照綜合格鬥（MMA）規則進行，九月或之前打擂台，作為挑戰者，阿Man須要提供二十萬元作賽事按金，但點畀錢就遲啲先傾。
黃洋達早有準備，質疑阿Man有走數前科，拿出對方早前因為佔旺而生意受損，揚言跳樓一事大肆恥笑，話「你之前話跳樓都走數啦！」要求對方先畀二十萬元訂金，阿Man初頭還價十萬元，但最後都應承畀錢。
二人要夾磅數先打得成
至於場地方面，黃洋達聲言要搞大個Show，要求喺灣仔伊利沙伯體育館舉行，更索價一百萬元。佢又話，如果喺康文署場地比賽，當局會要求拳賽要有拳擊總會人員在場，比較麻煩，建議喺酒店搵個ballroom舉行。阿Man還價，指有相熟師傅可以提供場地，兩邊陣營你一言我一語，更爆粗取笑對方咩都唔識，最後場地問題都係解決唔到。
之後兩人上磅量體重，黃洋達約166磅，阿man就177磅，按照意向書內容，限磅範圍介乎167至172磅，即係黃洋達要增加1磅，而阿Man要減5磅先可以「打得成」！阿Man仲話會在比賽時讓黃洋達，「你35歲我40歲，我讓你5年又點話！」夠晒霸氣。雖然文件都簽咗，但兩人就繼續拗埋啲小事，當黃洋達要求阿Man提供中文全名以免走數，阿Man就只係肯寫英文名Man Shek，一搞就已經拖咗半個鐘，稍後都唔知會否又為場地問題拗數。