中環出更：馬唯中桃園搭機 低調返港
婚後低調喺香港定居嘅台灣第一千金馬唯中（Lesley）之前返台北探望家人，佢尋日就被台灣傳媒發現低調由台灣返港。身為台灣的總統馬英九千金，Lesley本來可以避開人群，舒舒服服咁用機場貴賓通道辦理登機手續，但佢就選擇同其他乘客齊齊排隊，認真無架子。
媽咪冇送機 老公冇現身
尋日下晝，Lesley拖住行李現身桃園國際機場，只見佢直接去到航空公司嘅報到櫃枱辦理登機手續，之後就一個人經管制區過關出境，全程無保鑣陪同。Lesley平時會獲媽咪周美青送機，但周尋日罕有無出現，就連Lesley嘅老公蔡沛然（Allen）都無現身，唔知係Allen搭第二班機返香港吖？定係根本無同太太一齊返台北探親呢？
Lesley前年閃嫁金融才俊Allen，兩人婚後住喺中環堅道。熱愛藝術嘅Lesley早前獲西九旗下視覺文化博物館（M+）錄取，兼職擔任水墨藝術策展人一職。當時外界盛傳佢之所以唔肯全職工作，係要以家庭為重，方便隨時「造人」。不過，報道引述機場工作人員話，Lesley當時個肚並無隆起，料暫時無好消息公布喇。
卓妮