中環出更：名醫話當年 置業好easy
金融管理局早前再加樓市「辣招」，只令交投放緩，但對於青年人嘅上車夢，仍望門興嘆。一班名醫講開當年置業確輕鬆得多。香港牙醫學會早前搞春茗，名人到賀，講起置業，牙醫學會會長梁世民（Sigmund）自爆當年畢業一年後就做業主，畀一成首期上車，供百多萬元嘅物業話咁易，較依家出道嘅牙醫，算係好彩。
儲一年錢夠畀首期
Sigmund二十三歲就做業主，佢畢業嗰年人工有兩萬元，收入算唔錯，儲一年錢就夠畀首期，喺荃灣買第一層樓，可惜佢當年未有瞓身買多幾層，否則依家印印腳唔使做嘞。醫學界立法會議員梁家騮都係好年輕就置業，佢透露畢業後喺公立醫院工作，有房屋津貼，儲三、四年錢就上樓。雖然「上車」，但佢提醒年輕人置業咪心急，否則要承受風險。
春茗話題離唔開流感
律師會前會長王桂壎就等到三十五歲先置業，佢當年買樓係死慳死抵兼多得家人幫手先圓夢。春茗上，話題離唔開冬季流感，醫學會前會長謝鴻興話，香港醫生唔多願多打流感針，估計每一百個人當中，只有三成人有打針，比率遠低於歐美國家，提醒醫生們唔好掉以輕心，有打好過無打。
話口未完，醫管局行政總裁梁栢賢被人問起打咗流感針未，梁醫生答得爽快：「一早打咗啦！」話晒都係醫管局高層，無理由唔以身作則嘅。講番牙醫學會，今年大計多多，Sigmund話，嚟緊將為八十歲攞緊長者生活津貼嘅老人家免費鑲活動假牙，計落每人可以慳番兩萬元，預計有十二萬長者受惠。
卓妮