政情：傳黃永光競逐全國青聯副主席
匯聚內地各青年組織嘅中華全國青年聯合會（全國青聯）將於七月底換屆，由港人出任嘅兩個副主席名額又出現爭位戰。聽聞現任全國青聯副主席陳仲尼將落莊，另一副主席鄭志剛就傾向爭取連任，即係只有一個空缺，但有意爭上位嘅至少有三人，傳聞包括信和置業執董黃永光（Daryl）、香港青聯主席霍啟剛及香港菁英會創會會長施榮忻（Jaime），競爭情況有幾激烈可想而知。
霍啟剛施榮忻有份
今屆全國青聯共設十七位副主席，其中港人只有兩席，歷屆都爭崩頭。由香港青聯主席升任全國青聯副主席一向係傳統，所以啟剛向來都係熱門人選，甚至未上任青聯主席時已預咗佢會更上一層樓。至於Jaime亦一直係候選名單中嘅常客，唯獨Daryl係新面孔。佔領行動之後，青年工作係重中之重，今年初駐港解放軍及中聯辦支持成立香港青少年軍，由Daryl出任總監，唔知佢會否因此被睇高一線呢？