專上學生聯會尋日舉行周年大會及選舉投票，選出新一屆秘書長及各個職位。其中前學聯常委、嶺南大學學生羅冠聰一直被指係「內定」接替周永康擔任學聯秘書長嘅人選，但喺選舉前卻殺出「程咬金」，因另一學聯常委、於一二年加入「熱血公民」嘅中文大學學生司徒子朗宣布參選，與羅冠聰競逐秘書長一職。
司徒子朗曾係社民連會員，其後成為「人民力量」嘅支持者，並於一二年加入「熱血公民」，曾喺立法會議員黃毓民嘅辦事處任政策研究助理。
司徒子朗近年熱心參與社運，喺去年佔領行動清場時一度被捕，被控以「刑事藐視法庭」罪。今次司徒子朗參選，雖然贏面好低，但令羅冠聰冇咁舒服可以自動當選，十足議會選舉空降挑戰一樣。