中環出更：高永文戴口罩惹中招疑雲
政府去年底就本港農業嘅可持續發展進行為期三個月嘅諮詢，鄉議局尋日就趁諮詢期將近完結前，搞咗個香港新農業政策研討會，仲請咗食物及衞生局局長高永文等政府官員出席解畫。不過，高永文尋日狀態麻麻，見佢戴住口罩，連聲都沙晒，莫非佢都中招感染流感？高永文就澄清話唔係感染流感，只係失聲喎。不過，失聲點解要戴口罩呢？莫非佢係死撐，唔認中招？抑或係驚感染做定預防呢？
講得太多嘢致失聲
當大家再追問高永文點解失聲時，佢就用隻手指住個口，再加埋其他手勢解釋因為講得太多嘢，所以搞成咁。在旁嘅新聞秘書都笑佢，問佢喺研討會致詞時係咪要破天荒用手語。最後高永文梗係冇用手語啦，但致詞就好簡短。都好嘅，起碼佢唔使講得咁辛苦，在座嘅人亦唔使耳仔受罪。不過，高永文同班鄉紳影相時又貪靚除低個口罩喎，如果佢真係中咗招，班鄉紳就要小心啲喇！
卓妮