中環出更：反水客失控飲食業受罪
反水貨客亂象持續，令上水、屯門、元朗、尖沙咀等多區商舖遭殃，除零售界叫苦外，食肆生意亦受累。現代管理（飲食）專業協會主席黃永幟話，收到有會員反映，指示威者硬闖酒樓指罵客人，嚇走茶客之餘，顧客驚到過門而不入，估計損失數萬元生意額。
匯聚餐飲界精英嘅稻苗學會，日前舉行新春團拜晚宴，多間飲食集團老闆及從業員歡聚一堂。講起食肆遭示威者搗亂，幟哥大表憂慮，佢坦言業界面對租金高、人工貴，唔少食肆賺埋僅夠交租，以新春期間為例，俗稱「炒散」嘅兼職空缺，時薪高達七十至九十元，再加上近期受示威衝擊，飲食業真係無啖好食。
胡珠叫女工勸退示威者
新光集團創辦人胡珠講起招架示威者亦好頭痛，佢話為免小事化大，會先發制人，安排女同事或侍應喺門口擋駕，勸喻示威者離開。香港搵食艱難，近日佢亦北上買舖開食店，搵多幾個開源方法。至於喺佔領行動期間，結束旺角間米線店嘅稻苗學會主席邱金榮，總算苦盡甘來，月前喺中文大學開學生飯堂，開業三個月，生意唔錯。佢笑言多得班男拔萃書院舊生，升讀中大後繼續幫襯，認真有人情味。
講番晚宴，稻苗學會會長黃傑龍風騷現身，着上訂製嘅深藍色中山裝響應「中國風」主題。原來件衫係佢親自設計，事前上網搵晒資料，包括胸前衫鈕數目應該有幾多粒，然後返廣州搵裁縫訂造。雖然佢當晚未能奪得最佳服飾大獎，但誠意度就爆晒燈嘞。
卓妮