提起「伊斯蘭國」，人人都知呢個極端組織殺人如麻，尤其係處決人質嘅血腥畫面，簡直令人髮指。大家咪以為恐怖活動離香港好遠吖，激進勢力及恐怖活動無疆界之分，恐怖分子隨時潛伏喺大家身邊。
功夫茶唔係危言聳聽o架，近日有印傭喺同鄉聚腳點派發宣傳單張，招攬喺香港工作嘅印傭加入伊斯蘭國，並揚言加盟後會被派到內地新疆執行任務。據外傭組織透露，呢類招攬行動早喺兩年前已經開始，最近更加有擴展迹象，負責游說嘅人愈嚟愈多，仲會舉辦神秘活動添，搞到外傭圈人人自危，擔心恐怖勢力入侵香港。
諗起都恐怖，極端組織喺香港招兵，容乜易將香港變成恐襲大本營o架？現時全港有十五萬印傭，超越菲傭成為本地最大外傭人口，呢批印尼女傭長期喺異地打工，唔少生活枯燥，心靈空虛，好易被人乘虛而入，萬一有人受唔住游說加入極端組織，分分鐘變成社會嘅計時炸彈。先唔講發動恐怖襲擊吖，就算只係潛伏僱主家中，已經令人不寒而慄。試諗下，平日照顧你起居飲食、一家老幼嘅人，居然係思想偏激崇拜暴力嘅極端組織成員，嚇都嚇死喇。
講到呢度，麻煩官老爺速速補鑊，將伊斯蘭國嘅滲透活動連根拔起，以免市民生活喺恐怖陰影之中。正如法律界人士話齋，雖然派發宗教宣傳單張並不違法，但如有證據顯示涉及恐怖組織，並打算在港策劃恐怖活動，即屬違法，警方應該進行徹查。嗱，功夫茶提醒港產官僚，恐怖主義猶如癌細胞，如果唔盡早遏止，就會不斷擴散，一發不可收拾，到時盞爆大鑊嘅咋。
話時話，就算香港暫時冇恐怖主義威脅，一樣危機四伏，動盪不安。唔使講其他，佔領落幕，又來光復，搞到滿城風雨雞犬不寧，就係典型例子喇。呢班激進分子雖然人數唔多，但勝在夠暴力，夠無恥，以反水貨客之名，行暴力及港獨之實，唔止見人就鬧，見篋就踢，仲對途人拳打腳踢，連老弱婦孺都唔放過，簡直走火入魔。有人形容佢哋係港版伊斯蘭國，一啲都冇誇張。
其實，伊斯蘭國打住為宗教獻身嘅崇高旗號，做埋啲令人髮指嘅行徑，固然無人性，本港搞事分子一樣打着爭民主、保本土嘅旗號，犯下不義暴行，根本係五十步笑百步。講真，呢種不可理喻嘅盲目行為，同恐怖活動冇乜分別嘅咋。
無計喇，港府欺善怕惡，從來對攪亂香港嘅牛鬼蛇神都係心慈手軟，遲遲唔起訴佔領行動黑手就知喇。再咁落去，極端組織唔使向印傭招兵，香港隨時周街都係恐怖分子吖！