政情：今日你上鏡：胡鴻烈獲港大頒名譽博士

香港大學尋日頒授名譽社會科學博士學位予現年九十五歲、樹仁大學校監胡鴻烈，佢兩個仔兼樹仁副校長胡耀蘇及胡懷中亦有到場支持爸爸。現場所見，胡鴻烈依然眼仔睩睩非常精靈。問佢有冇諗住退休時，佢仲笑住話有，又話每日都仲有返學。當問及會否將個獎送畀已故嘅太太鍾期榮，佢就點頭示意會與妻分享。胡耀蘇代表胡鴻烈致詞時則話，十分榮幸接受港大畀父親嘅榮譽，令佢有機會喺呢度回顧過去六十年香港嘅轉變，又話樹仁要喺未來十年屹立不倒並繼續發展，須作出艱難抉擇，喺原則同實際兩者兼顧下力求精進，切合社會需要。