政情：黨友唔想梁耀忠再參選

街工立法會議員梁耀忠（阿忠）成日都話想退下火線，培養黨內新人上位，但一直只聞樓梯響。街工尋日公布三十周年晚宴安排，表明唔會邀請政府官員出席，阿忠仲特登帶晒黨內新人亮相，又畀足機會各人發言，想搵接班人嘅味道甚濃。

阿忠講起搵接班人嘅難處時話，試過搵有識之士入黨，但搵極都搵唔到，所以疊埋心水培養黨內新人，可惜新人多數想專注地區事務，唔想選立法會。雖然佢已六十一歲，但搵唔到人惟有繼續「做住先」，因為街工喺立法會一定要有代表，先至可以保有話語權。

不過，有黨員同阿忠講，如果佢繼續參選下屆立法會，黨友寧願含淚投白票都唔會支持佢，因唔想見到阿忠做極都唔肯走，令街工好似其他政黨咁玩老人政治喎！話時話，街工都成立三十年，連想搵個立法會接班人都咁難，認真有問題囉！