政情：公民講場：黨友「吳精明」嫻姐出口教

標準工時委員會達成共識，將研究立法規定僱主同僱員之間要簽訂寫明工時嘅合約。一向以打工仔爭取權益為己任嘅工聯會資深議員陳婉嫻（嫻姐），都炮轟政府以「合約工時」取代「標準工時」，有偷換概念之嫌。不過，風水輪流轉，有電台聽眾尋日趁嫻姐出席電台節目時，質疑同嫻姐同屬工聯會、身為委員會勞方代表嘅吳秋北出賣工人。嫻姐回應時直指吳秋北經驗不足，如喺會議中遇到唔同意情況，應提出停止會議；再者吳秋北同委員會其他成員一齊企出嚟見傳媒，亦係唔精明嘅做法。嫻姐以上言論，好似對吳秋北有恨鐵不成鋼嘅感覺，所以要出手打吓手板。不過如果打完都唔見得有轉機或有行動，到時難免畀人質疑有人喺度扯貓尾喇！