政情：毛孟靜 何秀蘭反口否決議案 惹建制泛民齊轟
立法會議員個人利益監察委員會（CMI）主席尋日代表CMI喺大會提出決議案，建議修改《議事規則》第八十三條中有關議員披露金錢利益嘅規定，容許議員喺討論立法建議時，只需要喺第一次會議發言時申報利益，同時又容許議員毋須披露屬於市民共同享有嘅金錢利益。本來修改《議事規則》已經取得多個黨派共識，加上喺委員會收集意見時未見反對，但外號「正盲毛」嘅公民黨毛孟靜同工黨何秀蘭，最後關頭先批評委員會事前冇諮詢佢哋，搞到泛民中人、民主黨主席劉慧卿（卿姐）批評佢哋唔尊重委員會，有建制派議員更直斥佢哋反口覆舌、出爾反爾。
「唔尊重委會 嘥時間」
立法會大會尋日討論是否修改《議事規則》，簡化議員披露金錢利益嘅規定。CMI事前已經用問卷諮詢全體議員意見，工黨同公民黨大部分議員表明同意有關修改，不過喺尋日大會上，正盲毛同何秀蘭居然突然扮失憶反對決議案，話放寬利益申報程序會影響市民對立法會嘅觀感，反批評委員會事先冇諮詢過佢哋嘅意見，淨係邀請各黨代表討論咗就算，認為立法會唔應該喺未得到大部分議員支持前，倉卒推行有關建議。
對於有泛民中人突然今日的我打倒昨日的我，卿姐冇因為大家係同路人而唔出聲，佢話議員雖然有言論自由，但覺得做人最重要係頂天立地，有誠信，唔好喺諮詢時明明贊成建議，但發言時就反對，批評佢哋嘅做法唔尊重委員會之餘，仲要嘥立法會開會時間。
「不應為選票埋沒良心」
分屬建制派嘅保險界議員陳健波其後發言時，大讚卿姐嘅言論發人深省，話議會需要做實事嘅議員，而唔係見到有位入就瘋狂抽水、曲解《議事規則》嘅議員。佢認為，議員唔應該為選票埋沒良心，大嘆一日有呢班人喺立法會，香港依然唔可以進行成熟嘅選舉。CMI主席葉國謙話，聽到泛民歪理連篇，曾經諗過不如撤回決議案，不過因為佢係代表委員會提出，所以打消念頭。而決議案最後以三十一票贊成、二十票反對，無法喺地區直選取得過半數支持而被否決。唔知正盲毛同何秀蘭畀泛民中人同建制派省到立立令後，下次會否保證唔會重覆犯下同一錯誤呢？