中環出更：議員懶行 叫立會裝櫃員機
會計界議員梁繼昌（Kenneth）尋日喺立法會發言時，自爆有議員提議秘書處喺立法會大樓內增設自動櫃員機（ATM）服務，等佢哋足不出戶都可以錢。秘書處曾經接觸過幾間銀行，不過間間都耍手擰頭，皆因立法會職員太少，擔心無乜生意做。
隔籬政總有部
查實立法會隔籬嘅政府總部內設有ATM，但一眾議員仍然覺得唔方便。Kenneth話，佢曾經喺立法會外搭的士，但發現帶唔夠錢，要向他人「籌錢」先得，所以若立法會有ATM都幾方便喎！
不過，如果立法會真係引入ATM，都要小心處理由邊間銀行提供服務，唔係就隨時引起政治口水。例如引入中國銀行ATM，分分鐘令身兼中銀（香港）信託董事長嘅金融界議員吳亮星好唔得閒；若引入滙豐銀行ATM，唔知會唔會招人話柄，批評立法會引入外國勢力呢？
卓妮