中環出更：社企派飯 善廚開幕
香港地租金貴，唔只市民難上車，唔少社企都因為捱唔到貴租而被迫遷。專門回收食物製作飯餐派畀有需要市民嘅慈善機構惜食堂，其位於港島嘅中央廚房都因租金高企而要另覓新址，好彩上海總會做善心人，一口氣用千四萬買咗柴灣一層四千幾呎工廈，以極平租金提供惜食堂做中央廚房，尋日特意舉行盛大開幕禮，場面好熱鬧。
惜食堂主席梁錦松、上海總會理事長王緒亮、惜食堂創辦人董愛麗，仲有資助該廚房營運經費嘅利希慎基金總裁何宗慈等人都有出席。現場亦有幾位受惠嘅長者，佢哋閒時都會喺廚房幫手做義工，實行幫人幫己。
滬總伸援 工廈平租
睇住董愛麗長大嘅王緒亮話，初初佢以為惜食堂係製作飯盒向基層出售，後來至知係免費派發，即刻覺得呢個做法好值得支持，所以向上海總會理事會提出購置工廈單位供惜食堂做中央廚房，以免佢哋寄人籬下經常要搬遷，結果好快就得到支持，大家仲決定加碼贊助埋裝修費添！
梁錦松亦話，多得上海總會幫手先有個咁大嘅廚房。佢話，四年前惜食堂只有港島中央廚房，每日提供二百盒飯，前年喺深水埗增設第二個廚房後，兩個廚房每日共可提供六千盒飯，數量增長既反映社會確有需求，亦多得社會善心人士嘅捐助，先至可以將件善事愈做愈大。話時話，上海總會嘅菜式非常出名，唔知日後有無機會派出大廚，幫手製作有上海風味嘅飯餐畀街坊歎吓呢？
卓妮