最近有段新聞引起好多人關注，八十後小夫妻死慳死抵，終於一圓業主夢，受到全城讚賞。不過咁，同樣一個「慳」字，可以有唔同效果，呢對小夫妻慳得有道理；而港府聲稱為咗「慳錢」，不斷將服務外判，結果慳唔到錢不特止，仲問題百出，弄巧反拙，咁就該煨咯。
呢，農曆年啱啱過咗無幾耐，康文署轄下公共圖書館嘅外判商就突然拉閘走數，最少五百名外判員工變相被炒魷，估計欠薪超過百萬元。外判員工過完年即失業已經夠晒徬徨，最離譜嘅係康文署關人個關，工會聯同外判員工要求康文署墊支欠薪，署方大耍太極，話要徵詢法律意見喎，你話係咪涼薄吖？
今次事件只係冰山一角咋，早前被評為財政表現唔合格嘅香港郵政，更加係醜聞多多，數到天光都數唔完。香港郵政經營不善，搞到年年虧損，郵政官僚算死草，居然以所謂「節流」為理由，唔止關閉部分郵局、裁減員工、縮短服務時間，仲將郵包存倉服務外判，點知外判商因為倉庫不敷應用，唔止將郵包向「高空發展」，仲將郵包夾硬壓細，好似玩疊羅漢咁，唔少郵包被壓到甩皮甩骨，問你怕未。
即係咁，為咗節省開支，提高效率，港府將部分服務外判，本來無可厚非，問題係港產官僚卸得就卸，外判服務之餘，連責任亦外判埋出去，咁又點可能唔出事呢？正如「東方報業民意調查」顯示，對於外判服務接二連三出現問題，三成九受訪者直斥當局將服務外判後無妥善監管；兩成九批評外判商淪為無王管；兩成七炮轟浪費公帑。
冇錯嘞，港府懶得就懶，卸得就卸，一味依賴外判服務，自己變成無牙老虎，唔止毫無議價能力，甚至任由外判商為所欲為，簡直係本末倒置，唔衰攞嚟衰。難怪四成受訪者批評政府監管不足；另外四成要求盡快堵塞監管外判商嘅漏洞；一成八直斥連責任都一齊外判。市民就講得啱嘞，妹仔大過主人婆，點都講唔通吖！
話時話，港府成日強調審慎理財，以為外判服務愈多愈好，其實係自己呃自己嘅咋。○七年審計署曾發表報告，批評政府部門對外判服務承辦商監管不足，促請當局加強規管及處分違規人士，點知時至今日，問題唔止冇解決，亂象反而愈來愈多，證明外判服務根本係因小失大，浪費公帑。
所以話，港產官僚最叻就係卸膊，多做多錯、少做少錯、唔做唔錯吖嘛，將服務外判晒出去，佢哋咪可以優哉游哉囉。至於外判商點樣違規，外判員工點樣被剝削咯喎，佢哋一於闊佬懶理！