探射燈：港女勇嫁他邦

Stephanie愛上會哭的男人

韓劇《來自星星的你》前年在網上熱播，Stephanie經同事介紹認識來自南韓的丈夫鄭先生，「佢外形唔算討好，冇男主角金秀賢俊朗外表及淵博學識，亦唔算富有，但勝在成熟穩重，或者係因為佢同其他韓男一樣服過兵役，所以較港男踏實。」

從長途戀愛到求婚的八個多月，沒有難忘的纏綿，沒有童話故事的浪漫，卻被鄭一個小舉動打動，「佢每次喺當地送我到機場搭飛機返港，都會大喊，呢個表現好真，扮唔到。」去年中秋節，他們在南韓遊車河時，鄭突然向她求婚，「不如我哋結婚。」她立即答允，「求婚唔浪漫，但很窩心！」

他們去年十月訂婚，今年二月結婚。外嫁到南韓的她，坦言選擇南韓伴侶時，生活上要克服很多困難，如夫妻的角色地位。她認識一位台灣女士，嫁到南韓後，被夫家要求只可做家庭主婦，「仲要入得廚房，出得廳堂」，在節日不可回台灣娘家，更不可與朋友聚會。

Yvette去年與Pushpendre結婚。（受訪者提供）	鄭氏夫婦今年二月在本港結婚，眾親友出席道賀。	印度擁有獨特文化，時有港女外嫁當地。（資料圖片）

陪妻返娘家 遵中國習俗

「丈夫並非大男人，佢陪我返外家，就會依我哋嘅文化習俗，到我哋返到佢家人屋企時，丈夫絕對唔會幫手，我仲要照顧埋佢屋企人，不過返到我哋兩小口家裏，丈夫會讓我先洗澡，又親自下廚，分擔家務，仲幫我按摩，非常溫柔。」但她指韓男非每個都是思想成熟，「年輕一代愛情觀易變，最重要係人夾人。」

她笑言，韓女不會過問另一半行蹤，「我一於少理，會打電話問佢幾時返屋企。有次見佢爛醉返嚟，我差啲想發脾氣，但見佢跌崩咗兩隻門牙，幾好笑，又嬲唔落，惟有勸佢唔好應酬咁多。」

Yvette嫁到印度新德里，發現兩地飲食差異大。	三思後行 詹小姐：「傾向找港男做伴侶，因為同聲同氣，溝通及生活上冇咁多顧忌。」	鄒小姐：「愛情無分國界，但嫁去外地前，要衡量適唔適應到當地嘅生活習慣及文化。」

Yvette不怕餐餐食咖喱

Yvette因愛上印度，嫁給印度人。她於○八年開始研究印度文化，人生第一次旅行，亦是印度，在一○年的大學課室，認識了印度交流生Pushpendre，大家志趣相投，互相吸引。她欣賞對方有計劃以及上進心，Pushpendre亦都對這個喜歡印度的港女深表愛慕，拍拖兩年半之後便共諧連理。

丈夫體貼 願意分擔家務

印度的獨特文化，她多年前到印度旅行時已感受到。「第一次到印度，係參加旅行團，喺當地出街時都會驚，因為被男人係咁望住，我唔敢出夜街。」

第二次去印度，是到南部城市班加羅爾工作假期十個月，深深體會印度生活及文化。

「情侶唔會隨便喺街拖手，更加唔會當街親熱。」在舊區居住的人，思想傳統，情侶做出親暱行為會遭他人非議。故此，她與丈夫在印度時，亦不會於公眾地方拖手。但回到香港，就會擺脫這個枷鎖，「喺公眾地方拖手、擁抱。」

她嫁到印度新德里，發現兩地飲食差異大，「喺香港，我好鍾意食印度菜，一個星期起碼食兩次，但喺印度，一日三餐都係食咖喱，真係好唔習慣，我要自己煮番炒蛋同多士平衡吓。」她苦笑說，在印度，每個家庭都會煮咖喱豆，這些豆為泥狀，口感怪，故每次用餐都會要求丈夫代吃，但丈夫有時會有微言，建議她不吃時，索性向親友提出。

重男輕女的階級觀念，在印度根深柢固，「好多時都係錫個仔多啲，未必願意畀女兒接受高等教育，而且女兒還要做家務。」惟她指出，並非所有印度人都思想保守，丈夫就是一個很體貼的例子，願意分擔家務。

了解當地文化 避免誤判

中文大學社會科學院助理講師鍾樂偉指出，女士外嫁，宜先了解當地文化習俗及價值觀，並要肯定自己可以適應，否則隨時恨錯難返。

他強調，單靠流行文化去認識一個地方，絕對不足夠，甚至容易出現誤判，「如韓劇包裝好，懂得如何吸引觀眾，好似金秀賢嘅角色，有外表、學識及財富，並會救女主角，如童話故事一樣，令女士容易代入劇中，亦影響對現實韓男及南韓社會嘅判斷。」

圖：崔祖佑、王卓輝

文：楊日輝、林建平