民主黨（白鴿黨）前主席兼立法會議員何俊仁（AV仁）早前宣布計劃喺立法會否決政改方案後辭職發動公投，白鴿黨內部對此存在好大分歧，資深老鴿李華明更明言反對，又話會喺黨內進行游說工作。不過有乳鴿話，辭職公投已係騎虎難下、勢在必行，睇嚟老鴿同乳鴿嘅一場大鬥法已在所難免。
白鴿黨最快下個月將會就AV仁辭職發動公投建議舉行會員大會並進行表決。啱啱升呢做白鴿黨副主席嘅中鴿尹兆堅估計，辭職公投建議最終會獲通過，而且支持同反對嘅比例仲會係七比三。佢分析，早前該黨換屆之後，三分之二嘅中委都係後生仔，佢哋都傾向贊成辭職公投，所以該建議應該會得到中委會支持，加上外界對白鴿黨發動辭職公投已有期望，相信黨內嘅資深黨員都會明白，如果唔做分分鐘畀人鬧得仲犀利。不過，老鴿又點會袖手旁觀任由件事咁樣發展落去呢？睇嚟好戲在後頭。