政情:鐵醫腳患 劈西瓜過「足」癮

尋日皇仁書院舊生會搞康樂日,幾十個校友齊齊返到母校參加踢西瓜波比賽。有「鐵醫」之稱嘅香港大學外科學系系主任盧寵茂雖然因腳傷無法參賽,但主持完頒獎儀式後,即場劈開一個真西瓜,過吓癮之餘,亦與一眾球員分甘同味。

踢西瓜波比賽係皇仁舊生嘅年度盛事,不過今時今日嘅小朋友已好少踢西瓜波,舊生會行勻港九新界都買唔到,索性搵內地工廠大量訂造。雖然落場玩嘅校友個個年紀有番咁上下,但踢波時都搏到盡,仲踢爆咗個波添!

難忘少時踢拖去踢波

盧寵茂話,當年因為校舍細,校方一直唔畀學生喺校內踢波。直至佢中三時,體育老師引入西瓜波,自此踢西瓜波成為皇仁仔嘅傳統。佢細個已經好鍾意踢波,喺屋邨踢拖去踢波,諗起就回憶無窮。

第一手消息請下載on.cc東網iPhone/iPad/Android/Windows Phone Apps