中港矛盾愈嚟愈難解，日前有人建議將教師到內地上國情課程列為入職要求，但被外界質疑呢個要求係想「洗腦」。立法會主席曾鈺成尋日批評呢個講法毫無根據，亦唔尊重香港嘅老師及知識分子。做過中學老師嘅曾鈺成又話，英國統治香港一百五十年，都唔可以洗香港人腦，如果要求教師返內地上國情堂就係「洗腦」，咁就真係太睇小依家啲老師喎！
