政情：議員騎呢飲食 周三派薑醋
議員平時返立法會除咗開會外，飲飲食食亦係一件大事。喺立法會擔任管事超過三十年嘅前管事羅秉義（Tony），尋日喺網台節目上大爆議員鮮為人知嘅一面。佢話議員們各有唔同口味及習慣，例如中華總商會前立法會代表黃宜弘每逢星期三開大會時，就會請議員食薑醋，佢嘅接班人廖長江（Martin）亦秉承咗呢個傳統，真係夠騎呢。
廖長江「弘」揚傳統
立法會議員蔣麗芸尋日喺網上節目訪問兩個月前退休嘅Tony，閒談議員嘅飲食習慣。Tony話，黃宜弘做議員時，每逢開大會都會請食薑醋，即使佢已經退下火線，但都叫Martin秉承呢個傳統。咁點解要食薑醋呢？我哋問過幾位立法會議員，佢哋話黃宜弘出名好客，請食嘢好平常，聽聞薑醋係出自中總會所餐廳，而且好出名，所以黃宜弘先會有請食薑醋嘅習慣。
謝絕味精 愛吃「手指」
Tony任職管事期間服務過多位議員，對議員們嘅口味可謂瞭若指掌。佢話立法局前主席施偉賢一食味精就會頭痛，所以為佢準備膳食時，都會特別提醒廚房唔好落味精。咪以為尊貴嘅議員對飲食都有高要求，Tony爆料話，唔少議員好似小朋友咁鍾意食零食，例如朱古力手指餅。所以佢同手足都會準備妥當，等議員開會開到悶時可以偷懶食吓嘢。潮流興「拉布」，依家議員周不時開會開到好夜，管事就準備纖維餅同埋粥，等議員醫肚。
雖然管事會盡量滿足議員嘅諸多要求，但唯一唔可以妥協嘅係茶水。因會議廳內只可以飲水係立法會嘅傳統，茶或咖啡等飲品一律禁止。Tony話，當年佢啱啱加入立法局做管事時，都有問過點解，有前輩話佢知，因為茶同咖啡會散發氣味，若容許議員喺會議廳內飲其他飲料，可能會影響他人，所以管事只會喺會議廳嘅前廳準備咖啡及茶，如果議員想頂吓癮，就要移玉步去前廳喇！