中環出更：選戰後蜜月「強」嫂唔介意
工聯會立法會議員郭偉強上月小登科，同太太姚影霞（Myolie）拉埋天窗，不過兩人至今仍未有度蜜月計劃，事關今年底將舉行區議會選舉，立法會選舉亦緊接喺明年舉行，盛傳將被工聯會委以重任嘅郭偉強正積極備戰。雖然選戰未到，但Myolie好體貼，唔介意立法會選舉後先去度蜜月喎！
郭恨抱B 盼一次起孖
政壇盛傳工聯會擬派郭偉強頂替王國興出選港島區，而王國興就空降九龍西，希望爭到九龍西新增嘅立法會席位，一舉為工聯會喺九西帶嚟「零的突破」。正因為咁，郭氏夫婦遲遲未去度蜜月。雖然Myolie話唔介意，但郭偉強就對造人計劃好心急，佢自爆今年已經三十七歲，驚遲啲年紀大陪唔到仔女踢波。所以佢已經計劃好區議會選舉後，嗱嗱聲展開造人計劃，仲話最好一次生兩個添。
最近好多口痕友話，如果一七年香港冇普選就唔結婚生仔，不過郭偉強一於好少理，仲話有冇普選都照生，睇嚟佢都好恨做爸爸喎！
卓妮